近日既淫照事件, 主角除左係相中各個主角之外, 矛頭更直指香港警方。

警方一反常態, 以高調、高姿態、高效率以及低智慧, 三高一低既作風黎處理呢件案件。

突然間閃出一百幾十人的警力來調查呢單案(之前成日話警力不足嫁喎?),

更準時開記招, 驚死你話佢無做野。  

一哥特警成更不惜公開出言恐嚇香港市民, 連藏有一張淫照都「可能」犯法。

東少而家先知, 原來香港警察係擁有釋法權的, 真係活到老學到老。

廣大網民對於林建岳超速一事記憶猶新, 呢頭又整單咁既事, 想我地當無事先難。

於是有網友分別發起二一零大遊行與及籌錢登報(www.article23.net)

我當然唔係一個花生客, 正所謂有錢出錢有力出力,

東少先捐$50支持登報(今日蘋果的警字兩個口廣告, 名單最右上角就係我名XD)

更o係今日連埋朋友去參加遊行。

其實東少出發前對於呢個遊行真係無乜大期望,

雖然搞手成功拎到警方既不反對通知書, 各份報章又一齊幫忙宣傳(神奇到蘋果同東方同一陣線, 都咪話唔驚)

但早前長毛的遊行「吹雞」得30人出席, 籌錢登報又由十幾萬變一萬,

廣大網民既吹水值, 縮沙指數及食花生能力真係毋庸置疑。

不過, 做人要有自己既原則, 我話過去, 就一定會去。

下午一點去到維園, 見現場好似得廿幾人, 堆晒橫額在地上, 一大堆記者圍住搞手等人,

我同朋友心諗, 唔係真係咁多人縮沙掛?

到點半正式起行, 一睇返後面, 竟然唔見龍尾, 原來都唔少人參加, 只係無圍埋黎企埋一齊。

起初警方只係開放行人路俾我地, 但由於人數比預期多出太多, 結果未行出銅鑼灣已經開左一條行車線俾我地行。

是日叫得最順口既口號就係「法律面前, 窮人含忍」(當然好多人讀左第二個音…xd)

而另一樣幾驚訝既, 竟然今日都幾多女孩子企出黎, (各位o係屋企食花生既人士, 請你認真諗下, 點解人地都企出黎, 你唔企?)

結果好順利地, 3點鍾準時到達中區警察總部。

最後今日人數係, 官方:五百人, 警方:二百五十人, 我自己估計, 就大約三百至四百左右。

呢個結果真係非常滿意, 今日年初四都仲有好多人要拜年, 或者唔o係香港,

我自己都有8個朋友想去而去唔到的, 仍然有呢個人數, 証明呢個世界仲有d唔係得把口既網民。

希望, 一哥真係聽到我地既聲音;

希望, 以後大家唔好再做花生客!!

—————————-

是日相片:

呢一張相, 我企o係隊伍大約1/3至1/2位置影向隊尾, 就相片可見, 人龍都有返咁上下長

網民自制橫額, 一流!(相信係高登爸打!xddd)

其他相片:

http://www.fotop.net/tonyk3388/080210